• తిరుపతి జిల్లాలో విలీనంపై హర్షాతిరేకాలు.. అభివృద్ధికి కొత్త బాటలు
• నియోజకవర్గ సమస్యలపై ముఖ్యమంత్రికి వినతిపత్రం సమర్పించిన ‘కుడా’ చైర్మన్ రూపానంద రెడ్డి

చిట్వేల్, జనవరి 07: ఎల్లో సింగం ప్రతినిధి

రైల్వే కోడూరు నియోజకవర్గ అభ్యున్నతి కోసం చారిత్రాత్మక నిర్ణయం తీసుకున్న ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ నియోజకవర్గ ప్రజల పక్షాన కూటమి నేతలు కృతజ్ఞతలు తెలిపారు. మంగళవారం విజయవాడలో ముఖ్యమంత్రిని మర్యాదపూర్వకంగా కలిసిన రైల్వే కోడూరు టీడీపీ ఇంచార్జ్ మరియు ‘కుడా’ చైర్మన్ ముక్కా రూపానంద రెడ్డి, నియోజకవర్గాన్ని తిరుపతి జిల్లాలో విలీనం చేసినందుకు ధన్యవాదాలు తెలియజేశారు.

-వెంకన్న సన్నిధికి కోడూరు చేరువ

ఈ సందర్భంగా రూపానంద రెడ్డి మాట్లాడుతూ.. కోడూరును తిరుపతి జిల్లాలో భాగం చేయడం ద్వారా ప్రజల చిరకాల ఆధ్యాత్మిక, సామాజిక ఆకాంక్షలు నెరవేరాయని పేర్కొన్నారు. తిరుపతి వంటి అంతర్జాతీయ స్థాయి నగరంతో అనుసంధానం కావడం వల్ల విద్యా, వైద్య, ఉపాధి రంగాల్లో నియోజకవర్గానికి కొత్త అవకాశాలు లభిస్తాయని ఆశాభావం వ్యక్తం చేశారు. ప్రభుత్వ నిర్ణయం పట్ల ప్రజల్లో హర్షాతిరేకాలు వ్యక్తమవుతున్నాయని ఆయన సీఎంకు వివరించారు.

-అభివృద్ధి ప్రాజెక్టులకు శ్రీకారం

కేవలం ధన్యవాదాలు తెలపడమే కాకుండా, నియోజకవర్గ భవిష్యత్తును దృష్టిలో ఉంచుకుని పలు కీలక అభివృద్ధి పనులపై రూపానంద రెడ్డి ముఖ్యమంత్రికి వినతిపత్రం సమర్పించారు.ప్రధాన రహదారుల విస్తరణ, గ్రామీణ ప్రాంతాల్లో రవాణా సౌకర్యాల మెరుగుదల.నియోజకవర్గంలో తాగునీటి సమస్య పరిష్కారానికి శాశ్వత ప్రణాళికలు. ప్రభుత్వ ఆసుపత్రులు, విద్యాసంస్థల్లో ఆధునిక వసతుల కల్పన.

-విశేష స్పందన.. భవిష్యత్తుపై భరోసా

ప్రజల ఆకాంక్షలకు అనుగుణంగా పాలన సాగిస్తున్న కూటమి ప్రభుత్వం, రాబోయే రోజుల్లో రైల్వే కోడూరుపై ప్రత్యేక దృష్టి సారిస్తుందని రూపానంద రెడ్డి ధీమా వ్యక్తం చేశారు. ముఖ్యమంత్రి కూడా సానుకూలంగా స్పందించి, నియోజకవర్గ అభివృద్ధికి పూర్తి సహకారం అందిస్తామని హామీ ఇచ్చినట్లు ఆయన వెల్లడించారు