కాకినాడ సార్లంకపల్లెలో జరిగిన అగ్నిప్రమాద ఘటనపై ముఖ్యమంత్రి శ్రీ నారా చంద్రబాబు నాయుడు సమీక్ష నిర్వహించారు. ఈ ప్రమాదంలో ఇళ్లు కోల్పోయిన బాధిత కుటుంబాల పరిస్థితిని అధికారులను అడిగి తెలుసుకున్న సీఎం, వారికి తక్షణ సహాయం అందించాలని స్పష్టమైన ఆదేశాలు జారీ చేశారు. ప్రతి బాధిత కుటుంబానికి వెంటనే రూ.25 వేల ఆర్థిక సాయం అందించాలని ఆదేశించడంతో పాటు, పూర్తిగా దగ్ధమైన ఇళ్లకు బదులుగా కొత్త ఇళ్లను మంజూరు చేయాలని అధికారులకు సూచించారు. బాధితులు ఎలాంటి ఇబ్బందులు ఎదుర్కొనకుండా తాత్కాలికంగా వసతి సౌకర్యాలు, ఆహారం, తాగునీరు, దుస్తులు వంటి మౌలిక అవసరాలను వెంటనే అందించాలని సీఎం ఆదేశించారు. అగ్నిప్రమాదంలో నష్టపోయిన వారి పునరావాసంపై ప్రభుత్వం పూర్తిగా బాధ్యత వహిస్తుందని చంద్రబాబు భరోసా ఇచ్చారు. అలాగే, భవిష్యత్తులో ఇలాంటి ఘటనలు పునరావృతం కాకుండా అగ్నిమాపక భద్రతా చర్యలను మరింత కట్టుదిట్టంగా అమలు చేయాలని అధికారులను ఆదేశించారు. ప్రభుత్వం బాధితుల పక్షాన నిలుస్తుందని, వారికి అన్ని విధాలా సహాయం అందిస్తామని సీఎం స్పష్టం చేశారు.