అల్లూరి సీతారామరాజు జిల్లా పాడేరు ఏజెన్సీ ప్రాంతంలో చలి తీవ్రత రోజురోజుకూ పెరుగుతోంది. తెల్లవారుజామున నుంచి ఉదయం వరకు దట్టమైన పొగమంచు కమ్ముకోవడంతో పర్వత ప్రాంతాలు పూర్తిగా కప్పబడ్డాయి. పొగమంచు కారణంగా వాహనదారులు దారి కనిపించక ఇబ్బందులు ఎదుర్కొంటుండగా, కొన్ని ప్రాంతాల్లో రాకపోకలు నెమ్మదిగా సాగుతున్నాయి.
అరకులో కనిష్ఠ ఉష్ణోగ్రత 7 డిగ్రీల సెల్సియస్గా, మినుములూరులో 8 డిగ్రీలుగా నమోదైంది. పాడేరు, చింతపల్లి మండలాల్లో 10 డిగ్రీల కనిష్ఠ ఉష్ణోగ్రతలు నమోదవడంతో ఏజెన్సీ ప్రజలు చలి నుంచి ఉపశమనం కోసం దుప్పట్లు, వెచ్చని దుస్తులను ఆశ్రయిస్తున్నారు. ముఖ్యంగా వృద్ధులు, చిన్నారులు తీవ్ర ఇబ్బందులు పడుతున్నారు.
చలి ప్రభావంతో ఆదివాసీ గ్రామాల్లో ఉదయం వేళల జీవన విధానం మారిపోయింది. ప్రజలు బయటకు రావడానికి వెనుకాడుతుండగా, రైతులు పొలాల పనులను ఆలస్యంగా ప్రారంభిస్తున్నారు. మరోవైపు పర్యాటక ప్రాంతమైన అరకులో చలి వాతావరణం పర్యాటకులను ఆకర్షిస్తోంది.
వైద్య శాఖ అధికారులు చలికాలంలో జాగ్రత్తలు పాటించాలని సూచించారు. ముఖ్యంగా చిన్నపిల్లలు, వృద్ధులు చలిగాలులకు గురికాకుండా చూసుకోవాలని, అవసరమైతే ప్రాథమిక ఆరోగ్య కేంద్రాలను సంప్రదించాలని తెలిపారు. రానున్న రోజుల్లో కూడా చలి తీవ్రత కొనసాగుతుందని వాతావరణ శాఖ అంచనా వేస్తోంది.
