మహాశివరాత్రి పర్వదినాన్ని పురస్కరించుకొని మాచర్ల డిపో భక్తుల కోసం విశేష ఏర్పాట్లు చేసింది. శైవక్షేత్రాలకు మొత్తం 42 ప్రత్యేక బస్సు సర్వీసులను నడుపుతున్నట్లు డిపో మేనేజర్ బత్తుల వీరస్వామి తెలిపారు. భక్తుల రద్దీని దృష్టిలో ఉంచుకొని మార్గాల వారీగా బస్సులను కేటాయించినట్లు వివరించారు. మాచర్ల నుండి పాలువాయి మీదుగా సత్రశాలకు 25 బస్సులు, గురజాల నుండి గోలి మార్గంగా సత్రశాలకు 2 బస్సులు నడుస్తాయి. అదనంగా, గురజాల నుండి దైదా ఆలయానికి 3 బస్సులు ఏర్పాటు చేశారు. దుర్గి మీదుగా మన్నేపల్లి కి ఒక బస్సు, తెరాలకు మరో బస్సు సర్వీస్ అందుబాటులో ఉంటుంది. ముఖ్యంగా, ప్రముఖ శైవక్షేత్రం శ్రీశైలానికి మాచర్ల నుండి 10 ప్రత్యేక బస్సులు నడపనున్నారు. ఈ ప్రత్యేక సర్వీసులు భక్తులు సౌకర్యవంతంగా, భద్రంగా ప్రయాణించేందుకు దోహదపడతాయని అధికారులు తెలిపారు. భక్తులు ఈ అవకాశాన్ని వినియోగించుకొని మహాశివరాత్రి వేడుకల్లో పాల్గొని, మహాదేవుని కృపకు పాత్రులు కావాలని డిపో మేనేజర్ కోరారు.