రాజంపేట: జనవరి 15,(ఎల్లో సింగం ప్రతినిధి)

సంక్రాంతి పండుగ వేళ అమాయక ప్రజల ఆశను ఆసరాగా చేసుకుని సైబర్ నేరగాళ్లు కొత్త తరహా మోసాలకు పాల్పడుతున్నారని, ప్రజలు అత్యంత అప్రమత్తంగా ఉండాలని రాజంపేట పట్టణ సీఐ నాగార్జున హెచ్చరించారు.
​గత కొద్ది రోజులుగా సోషల్ మీడియాలో, ముఖ్యంగా వాట్సాప్ గ్రూపుల్లో “మీకు రూ. 5,000 నగదు బహుమతి వచ్చింది” లేదా “పొంగల్ గిఫ్ట్ వోచర్ క్లెయిమ్ చేయండి” అంటూ కొన్ని లింకులు వైరల్ అవుతున్నాయి. వీటిపై సీఐ స్పందిస్తూ ప్రజలకు ఈ క్రింది సూచనలు జారీ చేశారు:
​లింకులను క్లిక్ చేయకండి: ఫోన్ పే లేదా గూగుల్ పే ద్వారా నగదు వచ్చిందంటూ వచ్చే గుర్తుతెలియని లింకులను క్లిక్ చేయడం వల్ల మీ ఫోన్ హ్యాక్ అయ్యే ప్రమాదం ఉంది. తద్వారా మీ వ్యక్తిగత సమాచారం దొంగిలించబడటమే కాకుండా మీ బ్యాంక్ ఖాతా ఖాళీ అయ్యే అవకాశం ఉంది.
​యూపీఐ పిన్ జాగ్రత్త: మీ బ్యాంక్ ఖాతాలోకి డబ్బులు జమ కావడానికి మీరు ఎప్పుడూ పిన్ ఎంటర్ చేయాల్సిన అవసరం లేదు. కేవలం ఇతరులకు డబ్బులు పంపేటప్పుడు మాత్రమే పిన్ అడుగుతుంది. ఎవరైనా డబ్బులు పంపిస్తామని చెబుతూ పిన్ అడిగితే అది నూటికి నూరు శాతం మోసమని గ్రహించాలి.

​అధికారిక యాప్‌లను మాత్రమే నమ్మండి:
మీకు ఏదైనా క్యాష్ బ్యాక్ లేదా రివార్డు వస్తే అది నేరుగా మీ ఫోన్ పే లేదా గూగుల్ పే యాప్ లోని ‘రివార్డ్స్’ సెక్షన్ లోనే కనిపిస్తుంది. విడిగా వచ్చే మెసేజ్‌లను, లింకులను ఎట్టి పరిస్థితుల్లోనూ నమ్మవద్దు.
​పండుగ పూట ఇలాంటి సైబర్ మోసాల బారిన పడి ఆర్థికంగా నష్టపోవద్దని, ఏదైనా అనుమానం వస్తే వెంటనే పోలీసులకు సమాచారం అందించాలని సీఐ నాగార్జున గారు కోరారు.