వీరఘట్టం మండలం: కె.ఇచ్చాపురం గ్రామంలో అభివృద్ధి పనులకు మరో అడుగు పడింది. గ్రామ బీటి రహదారి నుండి ఎండలమల్లేశ్వర ఆలయం వరకు సుమారు రూ.40 లక్షల అంచనా వ్యయంతో నిర్మించనున్న సీసీ రహదారి పనులకు శనివారం భూమి పూజ నిర్వహించారు. ఈ కార్యక్రమానికి పాలకొండ ఎమ్మెల్యే నిమ్మక జయకృష్ణ సోదరుడు, తోటపల్లి ప్రాజెక్టు మాజీ చైర్మన్ నిమ్మక పాండురంగ ముఖ్య అతిథిగా హాజరై శంకుస్థాపన చేశారు. గ్రామ సర్పంచ్ బిడ్డిక గౌరినాయుడు ఆధ్వర్యంలో నిర్వహించిన ఈ కార్యక్రమంలో ప్రజాప్రతినిధులు, గ్రామస్తులు పాల్గొన్నారు.

ఉపాధి హామీ పథకం ద్వారా ఈ సీసీ రహదారి నిర్మాణ పనులు చేపట్టనున్నట్లు నిర్వాహకులు తెలిపారు. ఆలయానికి వెళ్లే భక్తులు, గ్రామ ప్రజలకు సౌకర్యవంతమైన రాకపోకలు కల్పించడమే లక్ష్యంగా ఈ ప్రాజెక్టును అమలు చేస్తున్నట్లు పేర్కొన్నారు. రహదారి నిర్మాణం పూర్తయిన తర్వాత వర్షాకాలంలో ఏర్పడే ఇబ్బందులు తగ్గి, గ్రామానికి మెరుగైన కనెక్టివిటీ లభిస్తుందని ఆశాభావం వ్యక్తమైంది.

ఈ కార్యక్రమంలో ఫీల్డ్ అసిస్టెంట్ కుంబ్రిక మురళీ, కుంబ్రిక బాలకృష్ణ, మండంగి రాజు తదితరులు పాల్గొని పనులు త్వరితగతిన పూర్తి చేయాలని కోరారు. గ్రామ అభివృద్ధికి ప్రభుత్వం కట్టుబడి ఉందని, ప్రజల అవసరాలకు అనుగుణంగా మరిన్ని పనులు చేపడతామని నాయకులు తెలిపారు.